༄༅། ཆེད་ཞུ། ཀུན་གྱི་དགོངས་པར་མངའ་གསལ་ལྟར་ཐོག་མའི་འཆར་གཞི་ལྟར་ན་དཔལ་ས་སྐྱའི་ཁྲི་རབས་ཞེ་གསུམ་པའི་ཁྲི་འདོན་མཛད་སྒོ་དེ་བཞིན་ཕྱི་ལོ་༢༠༢༠ ཟླ་༣ ཚེས་༢༩ དང་༣༠ ཉིན་གནང་གཏན་འཁེལ་ཟིན་ནའང་རྒྱ་གར་མ་ཟད་འཛམ་གླིང་ཡུལ་གྲུ་དུ་མར་ཏོག་དབྱིབས་ནད་ཡམས་ཁྱབ་གདལ་འགྲོ་ཤུགས་ཆེ་བའི་རྐྱེན་པས་རེ་ཞིག་ཕྱིར་འགྱངས་མ་ཞུས་ཐབས་མེད་ལ་སོང་། ད་རེས་སླར་ཡང་གསལ་བསྒྲགས་ཞུ་རྒྱུར། བོད་ཆུ་སྟག་ལོ། ཟླ་ ༡ ཚེས་ ༡༣-༡༤ ཕྱི་ལོ་ ༢༠༢༢ ཟླ་ ༣ ཚེས་ ༡༦-༡༧ གཟའ་སྐར་འཕྲོད་སྦྱོར་དགེ་བའི་ཉིན་ས་གཞིས་པུ་རུ་ཝ་ལ་དཔལ་ས་སྐྱའི་མ་དགོན་ཐུབ་བསྟན་རྣམ་རྒྱལ་གླིང་དུ་༸སྐྱབས་མགོན་༸གོང་མ་ཛྙན་བཛྲ་རིན་པོ་ཆེ་མཆོག་དཔལ་ས་སྐྱའི་ལུགས་ཟུང་གསེར་གྱི་ཁྲི་འཕང་མཐོན་པོར་མངའ་གསོལ་ཁྲི་འདོན་གྱི་མཛད་སྒོ་གནང་རྒྱུའི་དུས་ཚོད་ད་ལྟའི་ཆར་གཏན་འབེབས་ཟིན་པ་ཡིན་ཞིང་། ཞིབ་ཕྲའི་གནས་ཚུལ་རྣམས་ནད་ཡམས་ཀྱི་གནས་སྟངས་ལ་གཞིགས་ཏེ་རྗེས་སུ་རིམ་པས་གསལ་བསྒྲགས་ཞུ་ཆོག་པ་དེ་དོན་དགོངས་དབྱིངས་སུ་མངའ་བ་ཞུ། དཔལ་ས་སྐྱའི་ཁྲི་རབས་ཞེ་གསུམ་པའི་ཁྲི་སྟོན་གོ་སྒྲིག་ཚོགས་ཆུང་ནས་༢༠༢༡ ཟླ༩ ཚེས་༧ ལ།།

༄༅། །དཔལ་ས་སྐྱའི་ཁྲི་འཛིན་ཞེ་གསུམ་པ་༧སྐྱབས་མགོན་༸གོང་མ་ཛྙ་ན་བཛྲ་རིན་པོ་ཆེའི་རྣམ་ཐར་མདོར་བསྡུས་བཞུགས་སོ། །

༧སྐྱབས་མགོན་འཁོན་གདུང་ཛྙ་ན་བཛྲ་རིན་པོ་ཆེ་ནི། ཡབ་ས་སྐྱ་༧གོང་མ་ཁྲིི་ཆེན་ཞེ་གཅིག་པ་ཆེན་པོ་མཆོག་དང་། རྒྱལ་ཡུམ་བཀྲ་ཤིས་ལྷ་སྐྱིད་གཉིས་ཀྱི་སྲས་སུ་བོད་རྒྱལ་ལོ་ ༢༡༠༦ ས་ལུག་བོད་ཟླ་ལྔ་པའི་ཚེས་བཅུ་སྟེ་སློབ་དཔོན་ཆེན་པོ་པདྨ་འབྱུང་གནས་ཀྱི་དུས་ཆེན་དགེ་བའི་ཉིན་ཕྱི་ལོ་ ༡༩༧༩ ཟླ་ ༧ ཚེས་ ༥ དེཧ་རཱ་དུན་དུ་སྐུ་འཁྲུངས། དེ་མ་ཐག་ཡབ་རྗེ་མཆོག་གིས་གོང་མའི་ཕྱག་སྲོལ་ལྟར་ལྗགས་ལ་དྷཱི་ཡིག་འབྲི་བ་དང་ལེགས་སྦྱར་སྐད་དུ་ཛྙ་ན་བཛྲ་སྟེ། ཡེ་ཤེས་རྡོ་རྗེ་ཞེས་པའི་མཚན་གསོལ།

མཚན་མཆོག་གསུམ་ལྡན་གྱི་གདུང་བརྒྱུད་རིན་པོ་ཆེ་འདི་ཉིད་ནི་ཐོག་མར་འོད་གསལ་ལྷ་ལས་བྱུང་ཞིང་། གཟུགས་ཁམས་ལྷ་གནས་ཀྱི་སྤུན་བདུན་ཡོད་པའི་ནང་ནས་བྱུང་བ་ཞིག་ཡིན་ལ། གདུང་བརྒྱུད་འདིར་དུས་རབས་བརྒྱད་པའི་ནང་ཨོ་རྒྱན་གུ་རུ་རིན་པོ་ཆེ་ཞལ་བཞུགས་སྐབས་ནས་འཁོན་ཀླུའི་དབང་སྲུང་བ་སོགས་མཁས་གྲུབ་མང་པོ་བྱོན་ཏེ་བོད་ཀྱི་ནང་བསྟན་ལ་མཛད་རྗེས་ཆེན་པོ་བཞག་ཡོད།